नेपाल समाचार (Nepal)

प्रचण्डले कमल थापालाई सरकारमा आउन आग्रह

बिराट नेपाल 2016-07-31

काठमाडौँ ।  

नेकपाका अध्यक्ष पुष्पकमल दाहाल प्रचण्डले राष्ट्रिय प्रजातन्त्र पार्टी नेपालका अध्यक्ष कमल थापालाई सरकारमा सहभागी हुन प्रस्ताव राखेका छन् । आइतबार दिउँसोको भेटमा प्रचण्डले थापालाई सरकार निर्माणमा सहयोग गर्न आग्रह गरेका हुन् ।

 

प्रधानमन्त्री केपी शर्मा ओलीले प्रधानमन्त्री पदबाट राजीनामा दिएपछि राष्ट्रपति विद्यादेवी भण्डारीले सहमतीय सरकारका लागि दिएको सात दिनको समय सकिएपछि आइतबारबाट प्रचण्डले सरकार निर्माणको पहल सुरुको क्रममा थापालाई सहभागीको लागि आग्रह गरेका हुन ।

 

माओवादी र नेपाली काँग्रेसले व्यवस्थापिका संसदमा प्रधानमन्त्रीविरुद्ध अविश्वासको प्रस्ताव दर्ता गराएर प्रधानमन्त्री ओलीलाई राजीनामा दिन बाध्य गराएकाले काँग्रेस र माओवादी गठबन्धनको सरकार बन्ने पक्का भएको छ ।

 

काँग्रेसले जिम्मेवार मन्त्रालय लिएर प्रचण्डलाई प्रधानमन्त्री बनाउने सहमति गरेकाले प्रचण्ड सरकार निर्माणको पहलमा अगाडि बढेका छन् । प्रचण्डले काँग्रेस बाहेक अन्य साना दललाई समेत सरकार निर्माणमा सहयोग गर्दै आउनु भनी भन्दै आएका छन् ।